Naxçıvan Dövlət Universitetinin İqtisadiyyat və idarəetmə fakültəsinin “Mühasibat” ixtisasında qiyabi təhsil alan V kurs tələbələri 17 mart tarixindən etibarən Naxçıvan Muxtar Respublikasının Maliyyə Nazirliyində istehsalat təcrübəsinə cəlb olunublar.
Təcrübənin ilk günündə Maliyyə nazirinin müavini Elvin Əlimərdanov tələbələrlə görüş keçirib. Görüş zamanı nazir müavini istehsalat təcrübəsinin tələbələrin peşə bacarıqlarını artırmaq, ali təhsil müəssisələrində əldə etdikləri nəzəri bilikləri praktiki biliklərlə möhkəmləndirmək və onların real iş mühitinə uyğunlaşmasına kömək etmək məqsədilə təşkil olunduğunu vurğulayıb.
Daha sonra Nazirliyin müvafiq şöbə üzrə əməkdaşları tələbələrə Naxçıvan Muxtar Respublikası Maliyyə Nazirliyinin Əsasnaməsi və strukturu haqqında məlumat veriblər. Bildirilib ki, təcrübə müddətində tələbələr Nazirliyin müxtəlif şöbələrinin fəaliyyət prinsipləri ilə yaxından tanış olacaq, maliyyə sistemində praktik bilik və bacarıqlar əldə edəcəklər.
Qeyd edək ki, istehsalat təcrübəsi çərçivəsində tələbələrə maliyyə sahəsində tətbiq olunan qanunvericilik, büdcə siyasəti və mühasibat uçotunun aparılması qaydaları barədə də ətraflı məlumat veriləcək.