İyulun 13-də Naxçıvan Muxtar Respublikasının Maliyyə Nazirliyində Nazirlik Aparatında və yerli bölmələrində mövcud olan vakant vəzifələr üzrə müraciət etmiş namizədlərlə görüş keçirilib.

Görüşün məqsədi Naxçıvan Muxtar Respublikasında Azərbaycan Respublikası Prezidentinin Səlahiyyətli Nümayəndəliyi, Naxçıvan Muxtar Respublikasının Nazirlər Kabineti və Naxçıvan Dövlət Universitetinin təşkilatçılığı ilə keçirilmiş “Karyera sərgisi - 2026” çərçivəsində Maliyyə Nazirliyi tərəfindən təklif olunan vakant vəzifələrə müraciət etmiş namizədlərlə tanış olmaq, onların müraciət və təkliflərini dinləmək, həmçinin qanunvericiliyin tələblərinə uyğun olaraq müvafiq dəstəyin göstərilməsini təmin etməkdən ibarət olub.

Maliyyə naziri Həsən İsmayılovun, nazir müavini Elvin Əlimərdanovun və Nazirliyin struktur bölmələrinin rəhbərlərinin iştirakı ilə keçirilən görüşdə namizədlərə qurumun fəaliyyət istiqamətləri barədə məlumat verilib, onlarla fərdi söhbətlər aparılıb və müraciətləri dinlənilib.

Sonra namizədlərin müraciətlərinin müvafiq qaydada dəyərləndirilməsi məqsədilə aidiyyəti üzrə tapşırıqlar verilib.