Maliyyə Nazirliyinin əməkdaşına “Dövlət qulluğunda fərqlənməyə görə” medalı təqdim olunub

Sentyabrın 4-də Naxçıvan Muxtar Respublikasının Maliyyə Nazirliyində Azərbaycan Respublikası Prezidentinin Sərəncamı ilə “Dövlət qulluğunda fərqlənməyə görə” medalı ilə təltif edilmiş Babək Rayon Maliyyə İdarəsinin rəisi Zeynalov Rasim Aydın oğluna medalın təqdimetmə mərasimi keçirilib.

Tədbirdə çıxış edən maliyyə naziri Həsən İsmayılov Rasim Zeynalovun dövlət qulluğunda uzunmüddətli və səmərəli fəaliyyətini yüksək qiymətləndirib, onun peşəkarlıq və məsuliyyətlə yerinə yetirdiyi xidmətlərin dövlət səviyyəsində qiymətləndirilməsinin əhəmiyyətini vurğulayıb.

Nazir bildirib ki, dövlət qulluqçularının əməyinə verilən bu cür yüksək qiymət onların gələcək fəaliyyətinə əlavə stimul olmaqla yanaşı, dövlət qulluğunda peşəkarlığın və məsuliyyətin təşviqinə xidmət edir.

Sonra Rasim Zeynalov əməyinə verilən yüksək qiymətə görə minnətdarlığını bildirib, bundan sonra da üzərinə düşən vəzifələri layiqincə yerinə yetirmək və dövlət qulluğunda səmərəli fəaliyyət göstərmək üçün səylə çalışacağını qeyd edib.

Sonda maliyyə naziri Həsən İsmayılov Azərbaycan Respublikası Prezidentinin “Dövlət qulluqçularının təltif edilməsi haqqında” 23 iyun 2026-cı il tarixli Sərəncamı ilə verilmiş “Dövlət qulluğunda fərqlənməyə görə” medalını Rasim Zeynalova təqdim edib və ona gələcək fəaliyyətində uğurlar arzulayıb.